Հայաստանի ֆինանսների եւ էկոնոմիկայի նախարար Վարդան Խաչատրյանը եւ Շվեյցարիայի ԱԳՆ քաղաքական հարցերով վարչության ղեկավար Բլեզ Գոդենը ստորագրել են տեխնիկական, ֆինանսական եւ մարդասիրական համագործակցության վերաբերյալ համաձայնագիր: Ինչպես տեղեկացրել են ՀՀ Ֆինանսների եւ էկոնոմիկայի նախարարության մամուլի կենտրոնում, համաձայնագիրն ուղղված է տնտեսության, սոցիալական հատվածի, շրջակա միջավայրի զարգացմանը, ինչպես նաեւ ժողովրդավարության եւ մարդու իրավունքների ամրապնդման: Համաձայնագրի շրջանակներում Հայաստանին կտրամադրվեն դրամաշնորհներ` 3,5 մլն շվեյցարական ֆրանկի չափով որպես տեխնիկական, եւ 3 մլն ֆրանկի չափով` որպես մարդասիրական աջակցություն: Տեխնիկական օգնությունն ուղղված կլինի բնական պաշարների, պետական գործերի կառավարման թափանցիկության, տեղեկատվության հասանելիության կառավարման բարձրացմանը, մարդասիրական օգնությունը` հակամարտությունների կարգավորմանը եւ բնության աղետների վերացմանը, մասնավորապես, վերաբնակեցված անձանց եւ բնակչության առավել անապահով սոցիալական խմբերի աջակցությանը: