«Ժամանակ» թերթի տեղեկություններով, երեկ առավոտյան Միքայելյանի անվան հիվանդանոցում մահացել է Արագածոտնի մարզի Վերին Սասնաշեն գյուղի գյուղապետ Արարատ Պողոսյանը:
Հիշեցնենք, որ Արարատ Պողոսյանն ապրիլի 7-ին կաթված էր ստացել և տեղափոխվել հիվանդանոց: Ըստ մեր ունեցած հավաստի տեղեկությունների՝ Պողոսյանը կաթված է ստացել մարզպետ Սարգիս Սահակյանի հետ հանդիպումից հետո, քանի որ վերջինս ընտրությունների հետ կապված մի շարք պահանջներ է դրել Պողոսյանի առջև:
Արագածոտնի մարզպետ Սարգիս Սահակյանի հետ զրույցը կարճ տևեց: Դիտարկմանը՝ շաբաթ օրը մի շարք գյուղապետերի հրավիրել եք Ձեզ մոտ և զգուշացրել՝ եթե նրանց գլխավորած որևէ համայնքում ՀՀԿ-ից ավելի ձայն հավաքած կուսակցություն լինի, ապա համայնքի ղեկավարները պատասխան են տալու, մարզպետը պատասխանեց.
«Մարդը մահացել է, անհարմար չէ՞, դուք զանգել, նման բան եք խոսում: Որտե՞ղ է դա շրջանառվում, ինչի՞ մասին եք խոսում, անհարմար չէ՞, մարդուն պարտադրեցին, ասացին՝ գնացեք նման բա՞ն արեք. այդպես լիներ՝ ուրեմն սաղ էլ կմահանային: Անհարմար է, մարդը մահացել է, փոխանակ զանգեք և լուրջ բան խոսեք: Վերջապես համայնքի ղեկավար է մահացել։ Որ տենց բաներ խոսում եք, մի քիչ վիրավորական է…»:
Իսկ, այնուամենայիվ, գյուղապետի հետ հանդիպում եղե՞լ է՝ հարցին մարզպետը արձագանքեց. «Ես նրան տասը-տասնհինգ օրից ավելի է՝ չեմ տեսել»:
