Հայաստանի պետական ագրարային համալսարանի երգի-պարի համույթը (ղեկավար՝ Ռ. Աբաղյան) Մոսկվայում մասնակցել է ԱՊՀ երկրների ագրարային բուհերի գեղարվեստական ինքնագործունեության մրցույթ-փառատոնին և վերադարձել փայլուն հաղթանակով: Այդ առիթով ՌԴ Տիմիրյազևի անվան համալսարանի ռեկտոր Վլադիմիր Բաուտինը շնորհակալական նամակ է հղել ագրարային համալսարանի ռեկտոր, ՀՀ ԳԱԱ թղթակից-անդամ, գիտության վաստակավոր գործիչ Արշալույս Թարվերդյանին: Նա գրել է, որ հայկական երգն ու պարը, համույթի կատարողական վարպետությունը խորապես հուզել, հիացրել ու ոգեշնչել են «Գարունը Տիմիրյազևկայում» ավանդական փառատոնի մասնակիցներին: Վ. Բաուտինը շեշտել է նաև, որ մշակութային շփումներն անչափ կարևոր են և օգնում են, որ փոխադարձաբար ավելի ճանաչելի ու ամուր լինեն ժողովուրդների միջև կապերը:
ՀՊԱՀ համույթն ունի շուրջ 12 տարվա պատմություն ու բուհական միջոցառումներից զատ նաև ՀՀ-ում ակտիվ համերգային գործունեության ավանդույթներ:
