ՀՀ Մշակույթի նախարարության պատմամշակութային հուշարձանների պահպանության գործակալությանը չի հետաքրքրում, թե ինչ է լինելու Փակ շուկայի ներսում վերանորոգման աշխատանքներից հետո: Այս մասին մամլո ասուլիսի ժամանակ ասել է գործակալության պետ Սերժիկ Առաքելյանը: Նրա խոսքով, գործակալությանը միայն հետաքրքրում է բուն հուշարձանի վիճակը:
Նրա խոսքով, այժմ Փակ շուկայի տարածքում աշխատանքներ չեն իրականացվում, Քաղաքաշինության նախարարությունը Երևանի քաղաքապետարանին ներկայացրել է շենքի վերականգնման համապատասխան նախագիծ:
«Թիվ 1 շուկա» ՍՊԸ տարածքում կատարվող վերանորոգման աշխատանքների շրջանակում առանց համապատասխան թույլտվության առկայության նախաձեռնել է շինության տանիքի փայտաշեն հատվածի փոխարինման աշխատանքները: «Վարչական իրավախախտումների վերաբերյալ» ՀՀ օրենսգրքի 154-րդ հոդվածի առաջին մասով կազմվել էր արձանագրություն` առանց թույլտվության տանիքի ծածկի քանդման աշխատանքներ իրականացնելու վերաբերյալ: Աշխատանքները դադարեցված են, և տարածքը վերցված է խիստ հսկողության տակ:
Շենքը գտնվում է ՀՀ պատմության և մշակույթի անշարժ հուշարձանների պահպանության պետական ցուցակում և ունի հանրապետական նշանակություն:
