Այսօր Երևանում տեղի ունեցավ «Խելացի երկրների խելացի լուծումները» նորարարական մրցույթի առաջին փուլը, հաղթող նախագծերը կներկայացվեն ԴիջիԹեք բիզնես համաժողովում և «Եվրասիա» երիտասարդական միջազգային համաժողովում:
Մրցույթի առաջին փուլում մոտ 30 երիտասարդներ ներկայացրեցին 14 նորարարական գաղափարներ: Հիմնական հայտերը ներկայացրել էին Երևանի պետական համալսարանի, Հայ-Ռուսական (Սլավոնական) համալսարանի, Եվրասիա միջազգային համալսարանի և այլ բուհերի ուսանողները:
Առաջին փուլում ընտրվեցին նորարար և մրցունակ գաղափարները, որոնց հիման վրա մասնակիցների ցանկությամբ ձևավորվեցին աշխատանքային թիմեր:
Մրցույթի հետագա փուլերի ընթացքում աշխատանքային թիմերը կկազմեն իրենց գաղափարների բիզնես-մոդելները, կմշակեն իրենց բիզնեսի փորձնական նախատիպերը:
Հաղթող թիմերը իրենց գաղափարների փորձնական նախատիպերը հնարավորություն կունենան ներկայացնելու հունիսի 15-16 կայանալիք ԴիջիԹեք Բիզնես Ֆորումում, և մայիսի 17-19 անցկացվող «Եվրասիա» միջազգային երիտասարդական համաժողովում:
