Վահան Հովհաննիսյանը վստահ է, որ Օբաման այս տարի էլ չի արտասանի «ցեղասպանություն» բառը. «Բայց դա ինձ արդեն չի էլ հետաքրքրում, որովհետև ինձ արդեն հետաքրքրում է հաջորդ նախագահը»,- լրագրողների հետ զրույցում ասաց ՀՅԴ խորհրդարանական ֆրակցիայի ղեկավարը:
«Հայերին պակասում է գիտակցությունը, թե ինչ կլինի Հայոց ցեղասպանության ճանաչմանը հասնելուց հետո: Մեր ժողովրդի միասնականությունը իշխանությունը դեռ չի կարողացել ապահովել, որովհետև մինչև հիմա անջրպետները, որ ստեղծվել են անցյալում, հաղթահարված չեն: Սփյուռքահայերն իրենց լիիրավ Հայաստանի ճակատագրի մասնակից չեն համարում, և դա կարծում եմ քաղաքական սխալ է եղել: Միասնականությունը կարող է ապահովել նոր որակ, և այդ նոր որակով կարող ենք հասնել համաշխարհային ճանաչման և ճանաչման Թուրքիայի կողմից»,- ասաց նա:
Անդրադառնալով Ցեղասպանությունների ժխտումը քրեականացնող Ֆրանսիայի օրինագծին՝ Հովհաննիսյանը նշեց, որ նախագահի ընտրություններից հետո օրինագծի աշխատանքները կվերսկսվեն. «Վստահ եմ, որ կվերսկսվեն, որովհետև սկսողը մենք ենք լինելու. կսկսենք նորից և կհաղթենք»: