Ուկրաինան նախատեսում է մասնակցել Իրան-Հայաստան գազատարի շինարարության տենդերին: Այդ մասին հաղորդել է Ուկրաինայի վարչապետ Վիկտոր Յանուկովիչը Հայաստանի վարչապետ Անդրանիկ Մարգարյանի հետ համատեղ մամլո ասուլիսի ժամանակ: «Մենք ունենք դրա համար (գազատարի շինարարություն) բոլոր անհրաժեշտ ռեսուրսները, սարքավորումները, տեխնիկան»,- ավելացրել է Վ.Յանուկովիչը: Ուկրաինան նաեւ շահագրգռված է Հայաստանում արդյունաբերական օբյեկտների շինարարությանը եւ վերակառուցմանը, էներգետիկայի եւ մետաղագործության օբյեկտների զարգացմանը մասնակցելու հարցում: Ա.Մարգարյանը նշել է, որ Հայաստանը իր հերթին շահագրգռված է մասնակցելու Ուկրաինայի հետ համատեղ նախագծերին, ինչպես նաեւ ուկրաինական գյուղատնտեսական տեխնիկան Հայաստան առաքելու հարցում: Վարչապետների կարծիքով, հայ-ուկրաինական տնտեսական համագործակցության միջկառվարական հանձնաժողովի երեկ Կիեւում տեղի ունեցած նիստի որոշումները պայմաններ կստեղծեն երկրների միջեւ ապրանքաշրջանառության հետագա աճի համար եւ կչեզոքացնեն առկա խոչընդոտները: Նիստի արդյունքում Հայաստանի եւ Ուկրաինայի կառավարությունների միջեւ ստորագրվել է համաձայնագիր մրցակցային քաղաքականության ոլորտում համագործակցության վերաբերյալ, հաղորդում է «ԻՆՖԱ»-ն: Նշենք, որ 2003 թվականին ապրանքաշրջանառությունը Հայաստանի եւ Ուկրաինայի միջեւ ավելացել է 1,4 անգամ, իսկ ընթացիկ տարում` երկու անգամ: