Շուշիի ազատագրման 20-ամյակի կապակցությամբ մայիսի 8-ին Շուշիում ներկայացվելու է «Արցախյան հարսանիք» նախագիծը: Ներկայացման պարերի բեմադրիչ, «Կարին» ավանդական երգի պարի խմբի գեղարվեստական ղեկավար Գագիկ Գինոսյանը մամլո ասուլիսում ասաց, որ «Արցախի հարսանիքը» տեղի է ունենալու ամրոցի տարածքում, իսկ հաջորդ օրը Ստեփանակերտի մարզադաշտում սպասվում է մեծ, տոնական շքերթ:
«Արցախյան հարսանիքը» եռամաս է, որտեղ առաջին մասում ներկայացված է խնամախոսությունը, երկրորդ մասում` հարսի` հոր տնից դուրս գալու պահը, երրորդ մասը` փեսայի տունը:
Նախագիծը ԼՂՀ մշակույթի նախարար Նարինե Աղաբալյանի գաղափարն է, բեմադությունն իրականացնելու է Արցախի «Մենք ենք, մեր սարերը» ազգագրական համույթը: Գինոսյանի խոսքով, միջոցառման կապակցությամբ կարվել են տարազներ, և բեմադրությունը իրականացվելու է արցախյան բարբառով:
Նախագիծը ծրագրված է ներկայացնել Երևանում և արտերկրում:
