«Այսօր արդեն դեղձի ու ծիրանի փոքր պտուղների վրա նկատելի են սնկային հիվանդության հետքեր, եթե հիմա սկսենք բուժումը, ապա կունենանք շուրջ 5000 տոննա բերք, իսկ եթե ոչ` ապա բերքի կորուստ կունենանք»,-այսօր այս մասին լրագրողների հետ հանդիպմանն ասաց «Հայաստանի ագրարագյուղացիական միավորում» ՀԿ-ի նախագահ Հրաչ Բերբերյանը:
Նրա խոսքով` այդ հիվանդություններն արդեն երկու տարի է գոյություն ունեն, դրան առավել նպաստում է անձրևային եղանակը, խոնավությունը:
Հրաչ Բերբերյանի համոզմամբ` բուժման ընդհանուր և ավիացիոն մեթոդը պետք է կիրառվի, քանի որ, եթե մի գյուղացին բուժի իր այգին, իսկ մյուսը` ոչ, ապա սնկային հիվանդությունը կրկին կվարակի բուժված ծառերը:
Հրաչ Բերբերյանը հիշեցրեց, որ երկու տարի առաջ, կարկուտ չեղավ, բայց սնկային հիվանդության պատճառով բերքի կորուստ ունեցանք: «Եթե պայքար չլինի՝ մի քանի տարի հետո կարող ենք բազմաթիվ ծառեր կորցնել»,- ասաց Հրաչ Բերբերյանը:
