Ուրուգվայի ԱԳՆ ղեկավար Լուիս Ալմագրոսը, այցելելով Ծիծեռնակաբերդ, ասել է, որ իր վրա մեծ տպավորություն է թողել այցելությունը Հայոց ցեղասպանության թանգարան-ինստիտուտ:
«Հայոց ցեղասպանությունը հանցագործություն է ոչ միայն հայ ժողովրդի, այլ ողջ մարդկության դեմ: Շատ ափսոս, որ անցյալից դասեր չքաղվեցին և ցեղասպանությունները ժամանակակից աշխարհում շարունակվում են»,-ասել է Ուրուգվայի ԱԳ նախարարը:
Նա նաև նշել է, որ Հայոց ցեղասպանության վերաբերյալ աշխարհին ուղղված իր ուղերձը հետևյալն է. հիշողություն, ճշմարտություն և արդարություն:
Ուրուգվայի ԱԳ ղեկավարը Հայաստանում է գտնվում ՀՀ ԱԳ նախարար Էդվարդ Նալբանդյանի հրավերով: Այցի շրջանակներում Լուիս Ալմագրոսը հանդիպում կունենա ՀՀ նախագահ Սերժ Սարգսյանի, իր հայ պաշտոնակից Նալբանդյանի ու Ամենայն Հայոց կաթողիկոս Գարեգին Երկրորդի հետ:
