«Հասարակական պաշտպանների միությունն» այսօր հայտարարություն է տարածել կապված ՀՀ հանրային ծառայությունները կարգավորող հանձնաժողովի այսօրվա որոշման հետ, ըստ որի` սահմանվել են սպառողներին խմելու ջրի մատակարարման, ջրահեռացման և կեղտաջրերի մաքրման մանրածախ ծառայությունների մատուցման սակագները, որոնց գումարային մեծությունը կազմում է 174,059 դրամ/խմ, գործող 174,065 դրամ/խմ-ի փոխարեն:
Ըստ հայտարարության` հանձնաժողովը խախտել է ՀՀ օրենսդրությունը` անտեսելով և արհամարհելով սպառողների կողմից բարձրացրած օրինական պահանջները, այն է՝ սակագնի հիմնական բաղադրիչի` օգտագործված ջրի ծավալների ոչ արժանահավատ լինելու հարցը և ընկերության կողմից ծառայությունների ոչ պատշաճ կատարման հարցը:
«Փաստորեն, ստացվում է, որ Երևան քաղաքում ջրամատակարարման սակագինը որևէ կապ չունի ջրամատակարարման ծառայությունների մատուցման որակի և սպառողների պահանջների հետ: Այն կախված է ընկերության կողմից ներկայացրած սուբյեկտիվ տվյալներից և հանրային ծառայությունները կարգավորող հանձնաժողովի կամ նրա նախագահի քմահաճույքից»,- նշվում է հայտարարության մեջ:
