«Բարգավաճ Հայաստան» կուսակցության ընտրացուցակի երկրորդ համար Վարդան Օսկանյանը պատմել է լրագրողներին, թե ինչպես է գործելու կուսակցությունը նորընտիր խորհրդարանում: «ԲՀԿ-ն կշարունակի այլընտրանք լինել գործող իշխանություններին, կշարունակի այլընտրանք լինել քաղաքական մեծամասնությանը, մենք փորձելու ենք իրականացնել մեր ծրագրերը»,- հայտարարել է նա մանդատների հանձնման արարողության ժամանակ:
Ըստ նրա, եթե կուսակցությունը համարի, որ խորհրդարան ներկայացվող օրինագծերը բխում են ժողովրդի շահերից, կողմ կքվեարկի, հակառակ դեպքում՝ դեմ կլինի: «Ինչպես արդեն ասվել է, մենք ճիշտը ճիշտ ենք անվանելու, սուտը՝ սուտ և փորձելու ենք իրական փոփոխություններ մտցնել մեր հասարակության մեջ»:
«Նախընտրական արշավի ժամանակ ԲՀԿ-ն խոսում էր իսկական փոփոխությունների մասին, ինչպես քաղաքական, այնպես էլ տնտեսական ու սոցիալական: Մենք խոստումներ ենք տվել ժողովրդին, խոսել ենք ծրագրերի մասին և խորհրդարանում հետևողականորեն կյանքի ենք կոչելու դրանք»,-ասել է Օսկանյանը:
Օսկանյանն ասել է նաև, թե կուսակցությունում չեն կարծում, թե հետապնդումներ կլինեն կոալիցիային չանդամակցելու համար և մտավախություն չունեն, որ կկրկնեն ՕԵԿ-ի ճակատագիրը, երբ վերջինս դուրս եկավ կոալիցիայից 2006թ.:
Երբ 2006թ. ՕԵԿ-ը դուրս եկավ կոալիցիայից, կուսակցությունը լքեցին գործարար պատգամավորները, ինչպես նաև կուսակցության անդամ նախարարները: Ինչպես հայտնում էին որոշ հայկական ԶԼՄ-ներ, դա եղավ ՀՀԿ կողմից կուսակցության վրա ճնշման հետևանք:
