Սիրիական հիմնախնդիրը կշոշափվի Սանկտ Պետերբուրգում Ռուսաստան-ԵՄ գագաթաժողովի շրջանակում` ինչպես պաշտոնական, այնպես էլ ոչ պաշտոնական կարգով, Բրյուսելում ուրբաթ օրը լրագրողներին անանուն մնալու պայմանով հաղորդել է եվրոպական պաշտոնյան: Այդ մասին հաղորդում է Ինտերֆաքսը:
«Մենք ուզում ենք, որպեսզի Ռուսաստանն օգտագործի սիրիական խնդրի վրա իր լծակի հնարավորությունները»,- ասել է ԵՄ ներկայացուցիչը: Նրա խոսքով` Սիրիայի վերաբերյալ խորը քննարկում է սպասվում կիրակի օրը ընթրիքի ժամանակ կարծիքների ոչ պաշտոնական փոխանակության ընթացքում և գագաթաժողովի պաշտոնական հատվածում` երկուշաբթի օրը կայանալիք լիագումար նիստում:
Դեռևս նախքան Ռուսաստան-ԵՄ գագաթաժողովը Սանկտ Պետերբուրգում ԵՄ արտաքին քաղաքականության և անվտանգության քաղաքականության գծով գերագույն ներկայացուցիչ Քեթրին Էշթոնը կքննարկի սիրիական խնդիրը ՌԴ ԱԳ նախարար Սերգեյ Լավրովի հետ: