Բրիտանական պաշտամունքային Big Ben աշտարակը կարող է վերանվանվել ի պատիվ Եղիսաբեթ II թագուհու: Համենայն դեպս, նման նախաձեռնության տակ ստորագրել են Մեծ Բրիտանիայի խորհրդարանի Համայնքների պալատի 331 պատգամավորներ` ներառյալ վարչապետ Դևիդ Քեմերոնին: «Հրաշալի է, որ օրենսդիրների նման մեծ քանակություն կողմ է այս գաղափարին, որի իրականացումը հարգանքի նշան կլինի` ի պատիվ թագուհու»,-Քեմերոնի խոսքը մեջբերում է «Դեյլի մեյլ» թերթը:
Օրենսդիրներն ասել են, որ Լոնդոնի այս խորհրդանիշը խոսակցականում կպահպանի իր հին անվանումը, սակայն պաշտոնապես այն կվեարնվանվի «Եղիսաբեթի աշտարակ»:
Big Ben-ը կառուցվել է 1858թ: Big Ben-ը աշտարակի վրա տեղադրված ժամացույցի մեծ զանգի անունն է: Այդպես կոչվում է նաև հենց ժամացույցը:
Եթե աշտարակը վեարնվանվի ի պատիվ թագուհու, ապա սա նմանատիպ առաջին դեպքը չի լինի: Խորհրդարանի արևմտյան աշտարակը, որը կոչվում էր «Արքայի աշտարակ», ի պատիվ այն ժամանակ իշխող թագուհու վերանվանվել է «Վիկտորիայի աշտարակ», հաղորդում է ԻՏԱՐ-ՏԱՍՍ-ը:
