Համագործակցության շանհայան կազմակերպության (ՀՇԿ) մասնակից երկրները հունիսի 6-7 Պեկինում կայանալիք գագաթաժողովի շրջանակներում ծրագրում են տարածաշրջանում երկարաժամկետ խաղաղության կառուցման և համատեղ բարգավաճման ձեռքբերման մասին հռչակագիր ստորագրել: Այդ մասին հայտնել է ՌԴ արտգործնախարար Սերգեյ Լավրովը Սինհուա չինական գործակալությանը տված հարցազրույցում:
«Մեր երկրների առաջնորդները տարածաշրջանում երկարաժամկետ խաղաղության կառուցման և համատեղ բարգավաճման ձեռքբերման մասին հռչակագիր կստորագրեն: Պետությունների ղեկավարների դիտարկմանը կներկայացվի լուրջ կոնցեպտուալ փաստաթուղթ՝ «Միջնաժամկետ հեռանկարում ՀՇԿ զարգացման ռազմավարության հիմնական ուղղությունները», որում ձևակերպված են մեր միության հետագա զարգացման առանցքային ուղենիշները»,- ասել է Լավրովը:
Բացի այդ, Լավրովի խոսքով, գագաթաժողովին պատրաստվել է 2013-2015թթ. ահաբեկչության, սեպարատիզմի և էքստրեմիզմի դեմ պայքարում ՀՇԿ անդամ պետությունների համագործակցության ծրագիր, հաղորդում է ՌԲԿ-ն:
