Կրասնոդարի հայերի գլխավոր խնդիրը հայապահպանությունն է, ասում է համայնքի ղեկավարը

PanARMENIAN.Net - Կրասնոդարի երկրամասի հայ համայնքի առաջին խնդիրը հայապահպանությունն է: Այդ մասին մամլո ասուլիսի ժամանակ ասաց համայնքի նախագահ Ռազմիկ Գևորգյանը: Երկրորդ խնդիրն այն է, որ համայքնը ցանկանում է ավելի լավ ներկայացված լինել երկրամասի իշխանալան կառույցներում: Կրասնոդարում կա չորս հայ պատգամավոր: Երկրամասում գործում են կիրակնօրյա դպրոցներ և մեկ հայկական դպրոց` Սոչիում: Համայնքի ղեկավարի խոսքով, կիրակնօրյա դպրոցներում քիչ են աշակերտները և չի ստացվում ավելացնել այդ քանակը, որովհետև տեղի հայերը չեն ցանկանում առանձնապես հայերեն սովորել: Ինչ վերաբերում է Հայաստանից վերաբնակեցված հայերին, նա ասաց, որ շատերը ջղայնացած են երկրի վրա, և չեն ցանկանում հայերեն սովորեցնել երեխաներին: Այս պահին, Գևորգյանի խոսքով, կառուցվում է հայկական 12 եկեղեցի Նովոռոսիյսկ, Մայկոպ, Լաբինսկ, Սոչի և այլ քաղաքներում: Անապայում այս տարի հայկական եկեղեցու շինարարությունը կավարտվի: Նա ցավով նշեց, որ շատացել է խառն ամուսնությունների քանակը, հատկապես տղամարդիկ շատ են ամուսնանում ռուս կանանց հետ:

Կրասնոդարի երկրամասում պաշտոնական տվյալներով ապրում է 700 հազար հայ, դա ամենամեծ հայ համայնքն է Ռուսաստանի Դաշնությունում: Համայնքը բաժանված է 44 փոքր համայնքների: Համայնքը վերաձևավորվեց նաև Արցախյան պատերազմի արդյունքում: Համայնքը խնդիրներ ուներ տեղի կազակների հետ, սակայն, Գևորգյանի խոսքով, այդ հարցը կարգավորվել է: