«Հրապարակ» թերթը գրում է, որ ԵԱՀԿ գործող նախագահ Էմոն Գիլմորի հետ խորհրդարանական կուսակցությունների հանդիպումը հայերենով բացելով ԱԺ արտաքին հարաբերությունների նախագահ Արտակ Զաքարյանն այնուհետեւ խոսքը փոխանցել է ԱԺ ԲՀԿ ներկայացուցիչ Վարդան Օսկանյանին։
«Վերջինս շատ արագ եւ առոգանությամբ սկսել է խոսել Ղարաբաղից եւ ընտրություններից`անգլերենի իր փայլուն իմացությամբ զարմացնելով պարոն Գիլմորին։ Կառուցողական ընդդիմությունից չի ցանկացել հետ մնալ արմատական ընդդիմության ներկայացուցիչ Լեւոն Զուրաբյանը։ Նա եւս խոսել է ընտրությունների «կեղծված» արդյունքներից եւ բանտարկված ՀԱԿ ակտիվիստներից։ Դարձյալ անգլերենով։ Պառլամենտական մեծամասնության ներկայացուցիչ Արտակ Զաքարյանը, տեսնելով, որ «իրավիճակը դուրս է գալիս վերահսկողությունից», ասել է, որ բոլոր երկրներում էլ ընդդիմության գործն իշխանություններից բողոքելն է։ Դարձյալ անգլերենով։ Արդյունքում բոլորով միասին խախտել են ՀՀ պաշտոնական լեզվի մասին օրենքը»,–գրում է օրաթերթը։
