«168 Ժամ» թերթը գրում է, որ իրենց տեղեկություններով հրաժարական ներկայացրած ԲՀԿ–ական նախարարները Սերժ Սարգսյանի հետ վերջերս կայացած առանձնազրույցի ժամանակ նրան ակնարկել են, թե պատրաստ են դուրս գալ կուսակցությունից, եթե նախագահի կողմից հրահանգ լինի։

«Նույն տեղեկությունների համաձայն` կոալիցային չմիանալու մասին ԲՀԿ ղեկավար Գագիկ Ծառուկյանի հայտարարությունից հետու կուսակցության գործարար պատգամավորները նույնպես միջնորդավորված ձևով ակնարկել են, թե անհրաժեշտության դեպքում պատրաստ են հեռանալ ԲՀԿ–ից։ ԲՀԿ–ական գործարարները մտավախություն ունեն, որ կարող են խնդիրներ ունենալ իրենց բիզնեսի հետ կապված։ Սակայն, ըստ նույն աղբյուրների, Ս. Սարգսյանը նրանց թույլ չի տվել հեռանալ կուսակցությունից` խոստանալով, որ նրանց բիզնեսի նկատմամբ ոտնձգություններ չեն լինի։ Իշխանական կուլիսներում խոսակցություններ են շրջանառվում, թե նախագահն առայժմ չի ցանկանում թուլացնել ԲՀԿ–ն և նախագահական ընտրություններին ընդառաջ վատ հարաբերություններ ունենալ Գ. Ծառուկյանի հետ։ Նա թե´ ԲՀԿ–ական նախկին նախարարներին, թե´ գործարար պատգամավորներին, հրահանգել է մնալ ԲՀԿ–ում և սպասել մինչև նախագահական ընտրություններին»,–գրում է թերթը։