Արգենտինահայ թենիսիստ Դավիթ Նալբանդյանը, որը որակազրկվել է Լոնդոնում եզրափակիչ մրցաշարի ժամանակ ոչ մարզական վարքագծի համար, ներողություն է խնդրել իր երկրպագուներից անզուսպ պահվածքի համար: Queen’s Club եզրափակչում նա հանդիպում էր խորվաթ Մարին Չիլիչի հետ:
Բաց թողնելով փոխանցումը երկրորդ սեթի 7-րդ գեյմում՝ Նալբանդյանը ոտքով հրել է գովազդային վահանակը, որը եզրագծում էր գծային մրցավարի աթոռը, և վնասել է նրա ոտքը: Խաղի գլխավոր մրցավարը դրանից հետո անհապաղ դադարեցրել է խաղն ու որակազրկել Նալբանդյանին:
«Ես ափսոսում եմ, որ արեցի դա: Այդ պահին ես շատ ջղայնացած էի ինքս ինձ վրա , երբեմն նման զգացմունքները դժվար է վերահսկել: Ես համաձայն եմ, որ սարսափելի սխալ եմ գործել, սակայն բոլորն են սխալներ թույլ տալիս: Ես չէի ցանկանա, որ ամեն ինչ հենց այսպես ավարտվեր: Ներողություն եմ խնդրում բոլոր երկրպագուներից»,-ասել է Նալբանդյանը պարգևատրման արարողության ժամանակ: