Հունիսի 27-ին Նարեկացի արվեստի միությունում կայացավ հայկական աղամանների ցուցահանդեսի բացումը:
Աշխատանքների հեղինակները «Տերրակոտտա» մանկական խմբի սաներն են (գեղարվեստական ղեկավար Նանա Մանուչարյան):
Բացման խոսքում Մանուչարյանը շեշտեց, որ իրենք չեն պատրաստում շուկայական նմուշներ, նշելով, որ ցուցահանդեսի նպատակը նաև երեխաներին ոգեշնչելն է, որպեսզի սեպտեմբերից սկսած նրանք ավելի ոգևորված սկսեն աշխատել, ստեղծագործել:
Իր հերթին միության նախագահ Նարեկ Հարթունյանը նշեց, որ ուրախ է ՆԱՄ-ում այսքան տաղանդավոր երեխաների աշխատանքներ տեսնել: Նա երեխաներին որպես օրվա հուշ Հովհաննես Թումանյանի ծոռան՝ Ռուբեն Քանքանյանի կողմից նկարազարդված օրացույցներ նվիրեց, իսկ Նանա Մանուչարյանին՝ միության խորհրդանշական նվերներից նուռն ու Հ. Թումանյանի մանկական բանաստեղծությունների գիրքը՝ դարձյալ Ռուբեն Քանքանյանի նկարազարդմամբ:
Ցուցահանդեսին մասնակցում են 6-14 տարեկան 20 երեխա, ցուցահանդեսը կշարունակվի մինչև հուլիսի 2-ը: