Լեհաստանում դատապարտված ռուս երկրպագուները բողոքարկել են դատարանի որոշումը
Լեհաստանում մի քանի ամսվա ազատազրկման դատապարտված Ռուսաստանի քաղաքացիները, որոնք պատիժ են կրում Եվրո-2012-ի ժամանակ բախումներին մասնակցելու համար, բողոքարկել են դատարանի որոշումը: Այդ մասին լրագրողներին է հայտնել Լեհաստանում Ռուսաստանի դեսպան Ալեքսանդր Ալեքսեևը:
«Երեքը բողոքարկել են դատավճիռը»,-ասել է նա, հիշեցնելով, որ մինչ օրս դատարանի որոշմանը ծանոթացել է երեք ռուսաստանցի, որոնցից մեկը դատապարտվել է երեք ամսվա ազատազրկման, իսկ երկուսը՝ երկու ամսվա:
Ռուսաստանի չորս քաղաքացիներ, որոնց գործը լեհական կողմը որոշել է քննել սովորական, ոչ թե արագացված ռեժիմով, մնում են կալանքի տակ: Այդպիսով, ձերբակալվածները գրեթե մեկ ամիս կանցկացնեն բանտում մինչև դատը:
