«ԱՐՄԵՆՏԵԼԸ» ԿՊԱՀՊԱՆԻ ԻՐ ՄԵՆԱՇՆՈՐՀԱՏԻՐՈՒԹՅՈՒՆԸ ԵՎՍ 10 ՕՐ
Հայաստանի կառավարության նախօրեին հրավիրած արտահերթ նիստում քննարկվել է «ԱրմենՏել» հեռահաղորդակցության օպերատորի մենաշնորհատիրական իրավունքների լիցենզիայում փոփոխություններ եւ լրացումներ մտցնելու մասին» եւ «Հաշտության համաձայնագիր ստորագրելու լիազորություն տալու մասին» որոշման նախագծերը: Ինչպես լրագրողներին տեղեկացրել է ՀՀ կառավարության մամուլի քարտուղար Մերի Հարությունյանը, վիճաբանությունների արդյունքում կառավարության անդամներին տրվել է մեկ շաբաթ` «ԱրմենՏել» ընկերության հետ Հայաստանի արդարադատության նախարար Դավիթ Հարությունյանի բանակցությունների արդյունքներին ծանոթանալու, ինչպես նաեւ իրենց կարծիքները հայտնելու համար: Միեւնույն ժամանակ, հաշվի առնելով այն հանգամանքը, որ հոկտեմբերի 28-ին պետք է ուժի մեջ մտներ «ԱրմենՏել» ընկերության լիցենզիայում փոփոխություններ մտցնելու մասին կառավարության որոշումը, նիստի ընթացքում որոշվել է` եւս 10 օրով հետաձգել սահմանափակումներ կիրառելու ժամկետը: Նշենք, որ կառավարությունն արդեն երրորդ անգամ է ընդունում սահմանափակումները ուժի մեջ մտնելու ժամկետները հետաձգելու մասին որոշումը:
