Բնապահպանության նախարար Արամ Հարույթունյանը, ի պատասխան «Թռչկան» քաղաքացիական նախաձեռնության նամակի, որում բանպահպանները ահազանգում էին Արփա գետի վտակ Հերհերի չորացման մասին, արդեն հանձնարարականներ է տվել բնապահպանության պետական տեսչությանը ուսումնասիրելու թռչականցիների բարձրացրած խնդիրները:

Այս մասին PanARMENIAN.Net-ի թղթակցին ասաց բնապահպանության նախարարի մամուլի խոսնակ Հասմիկ Մկրտչյանը:

Մկրտչյանը նշեց, որ այժմ դիմումը ուսումնասիրման փուլում է, արդյունքները կհրապարակվեն ավելի ուշ: Երեկ «Թռչկան» քաղաքացիական նախաձեռնությունը նամակ էր հղել բնապահպանության նախարար Արամ Հարությունյանին, որտեղ բնապահպաններն ահազանգում են Արփա գետի վտակ Հերհերի չորացման վտանգի մասին: Նամակում նշվում էր, որ վտանգի տակ է Արփա գետի աջակողմյան Հերհեր վտակը, որի վրա կառուցված են երկու փոքր ՀԷԿ-եր: Բնապահպանները նշում էին, որ գետի հունը և ջրվեժներից մեկը ամբողջովին չորացել են, իսկ երկրորդ` Հերհեր ջրվեժից, որը նաև ՀՀ բնության հուշարձանների ցանկում է, շատ փոքր քանակությամբ ջուր է թափվում: