ԼՂՀ ոստիկանությունում նախագահական ընտրությունների վերաբերյալ լուրջ բողոքներ չեն ստացվել

PanARMENIAN.Net - Նախագահական ընտրությունների օրը ԼՂՀ ոստիկանությունում լուրջ բողոքներ չեն ստացվել: Այս մասին ԿԸՀ մամլո կենտրոնում կայացած ճեպազրույցի ժամանակ հայտարարել է ԼՂՀ կառավարությանը կից Ոստիկանության մամլո ծառայության ղեկավար Ֆելիքս Հարությունյանը: Սակայն, ըստ նրա, Ասկերանի շրջանում փորձ է արվել խանգարել ընտրություններին:

«Հարուցվել է քրեական գործ, նյութերը հանձնվել են շրջանային դատախազություն»,-ասել է Հարությունյանը:

Տեղական ժամանակով 20:00 դրությամբ Արցախում փակվել են ընտրատեղամասերը: Արցախի նախագահի պաշտոնի համար առաջադրվել են գործող նախագահ Բակո Սահակյանը, Արցախի ԱԺ պատգամավոր, ՊՆ նախկին փոխնախարար Վիտալի Բալասանյանը և Հայաստանի ագրարային համալսարանի Ստեփանակերտի բաժանմունքի պրոռեկտոր Արկադի Սողոմոնյանը:

Ըստ Արցախի ԿԸՀ հրապարակած վերջին տվյալների, 17:00 դրությամբ քվեարկել է ընտրողների ընդհանուր թվի 63,24 տոկոսը կամ 62765 ընտրող:

Ստեփանակերտում արդեն քվեարկել է 21168 մարդ, կամ ընտրողների 57.79 տոկոսը, Ասկերանի շրջանում՝ 8377 մարդ, կամ ընտրողների 71.95 տոկոսը, Հադրութի շրջանում՝ 6392 մարդ, կամ 73.90 տոկոսը, Մարտակերտի շրջանում՝ 8968 ընտրող կամ ընտրողների 67.87 տոկոսը, Մարտունու շրջանում՝ 9899 ընտրող, կամ 57.60 տոկոսը, Շահումյանի շրջանում 1408 մարդ կամ 78.75տոկոսը, Շուշիի շրջանում 2352 մարդ կամ 65.10 տոկոսը, Քաշաթաղի շրջանում՝ 3803 մարդ, կամ 62.65 տոկոսը:

Երևանում ընտրություններին մասնակցել է 398 ընտրող, կամ ընտրողների 86.71 տոկոսը: