2012 թ-ի ընդունելության քննություններին 115 դիմորդ գրավոր քննություն է հանձնել ռուսաց լեզվից: Այդ մասին լրագրողների հետ հանդիպմանն ասաց ՀՀ կրթության և գիտության նախարարության Հանրակրթության վարչության գլխավոր մասնագետ, քննական հանձնաժողովի նախագահ Լիլյա Բալասանյանը: Նրա խոսքով, այս առարկայի գծով դիմորդների թիվը կազմել է 120, բայց ներկա են եղել 115-ը: Քննությանն անբավարար են ստացել 35 դիմորդներ, մեկ հոգի ստացել է 19 միավոր, իսկ 20 միավոր ընդհանրապես չի գրանցվել:

Բալասանյանի խոսքով, դա ցույց է տալիս, որ երկրում ռուսերենի դասավանդումը պատշաճ մակարդակի վրա չէ:

2011 թ-ի դեկտեմբերին որոշվեց ռուսերենը դասել օտար լեզուների թվին, և թույլատրվեց անգլերենի կամ ֆրանսերենի համար ընդունված նույն հիմունքներով բուհ ընդունվել: Մասնագետն այս տարի ռուսերեն հանձնող դիմորդների այս փոքր թիվը բացատրում է իրազեկման բացակայությամբ և հույս հայտնում, որ եկող ընդունելության քննություններին այդ թիվը կավելանա: