Լեոնիդ Ենգիբարյանի անվան մնջախաղի թատրոնների միջազգային փառատոնի հանդիսավոր բացումը տեղի կունենա օգոստոսի 10-ին Ծաղկաձորում: Այդ մասին լրագրողների հետ հանդիպման ժամանակ ասաց Երևանի մնջախաղի պետական թատրոնի գեղարվեստական ղեկավար Ժիրայր Դադասյանը:
Այս տարի Ծաղկաձոր են ժամանելու մնջախաղի թատրոններ և խմբեր Դանիայից, Լեհաստանից, Իտալիայից, Ճապոնիայից, Թուրքիայից, Ղազախստանից, անշուշտ, Հայաստանի մասնակցությամբ:
Ճապոնիայի ներկայացուցիչ Մակոտո Ինոուեն կներկայացնի Շեքսպիրի Ռիչարդ 3-րդ պատմական պիեսի հիման վրա արված ներկայացումը, որի վերջում հնչելու է Արամ Խաչատրյանի «Դիմակահանդեսը»:
5 օր տևողությամբ փառատոնի կարգախոսն է «Թատրոնը դեպի փողոց, դեպի հանդիսատեսը», և նպատակն է միջազգային թատերական և մշակութային կազմակերպությունների հետ համագործակցել, անդամակցել համաշխարհային թատերական գործընթացներին: Այս տարվա փառատոնի խորհրդանիշը Ենգիբարյանի մեդալներն են: Փառատոնի ընթացքում սպասվում է նաև «Կրակ-շոու»:
