ԱՄՆ նախկին նախագահ Բիլ Քլինթոնը հանդես կգա գլխավոր ելույթով սեպտեմբերին կայանալիք Դեմոկրատական կուսակցության համագումարում, որտեղ պաշտոնապես կառաջադրի գործող նախագահ Բարաք Օբամայի թեկնածությունը: Այդ մասին հայտնում է CBS News-ը:
Ինչպես նշում է «ՌԻԱ Նովոստին», Քլինթոնը շարունակում է մնալ ամենաճանաչված քաղաքական գործիչ դեմոկրատների թվում, չնայած նրան, որ նրա նախագահությունն ուղեկցվում էր մի շարք սկանդալներով և ինքը՝ նախկին նախագահը վերջին տարինեին մի քանի անգամ հայտարարել է Օբամայի հետ տարաձայնությունների մասին:
Սեպտեմբերի 5-ին ելույթից զրկված փոխնախագահ Ջոզեֆ Բայդենը, որը կրկին մասնակցում է ընտրություններին Օբամայի հետ, հաջորդ օրը հանդես կգա և պաշտոնապես կներկայացնի գործող նախագահին որպես թեկնածու: Ըստ ԱՄՆ քաղաքական ավանդույթի, նախագահության թեկնածուները ձևականորեն առաջադրվում են կուսակցական համագումարներում: