Նախագահական ընտրությունները Լեռնային Ղարաբաղում ցույց տվեցին ոչ միայն չճանաչված հանրապետության պետական ինստիտուտների զարգացման աստիճանը, այլ նաև Ստեփանակերտի հավատարմությունը ժողովրդավարական արժեքներին: Այդ մասին Analitika.at.ua-ին է հայտարարել ուկրաինացի փորձագետ, «Քաղաքականություն» վերլուծական կենտրոնի միջազգային նախագծերի համակարգող Օլեգ Սմիռնովը:
«Քաղաքական մեկուսացման և տնտեսական շրջափակման պայմաններում ԼՂՀ ղեկավարությունը ունակ եղավ անցկացնել միջազգային ժողովրդավարական չափանիշներին համապատասխանող ընտրություններ»:
Հաշվի առնելով աշխարհաքաղաքական իրողությունները՝ Լեռնային Ղարաբաղի համար դժվար է ստանալ Արևմուտքի միանշանակ աջակցությունը: Փոխարենը, մեծաքանակ օտարերկրացի դիտորդների մասնակցությունը վկայում է, որ համաշխարհային հանրության մի մասը հասկանում է, որ ԼՂՀ անտեսումը որպես ինքնուրույն պետություն անհեռանկարային է:
Ընտրությունները ԼՂՀ-ում, այս դեպքում նախագահ Բակո Սահակյանի վերընտրությունը, անցնում են օրինական ճանապարհով և բնակչության ազատ կամարտահայտման պայմաններում: Քաղաքական ինքնագիտակցության աճը ղարաբաղյան հանրության շրջանում կնպաստի ԼՂՀ ճանաչմանը միջազգային ասպարեզում, վստահ է ուկրաինացի փորձագետը: «Դրա վկայությունն է մի շարք եվրոպական երկրների, ինչպես նաև Թուրքիայի ու Ադրբեջանի արձագանքը, որոնք հայտարարեցին, որ չեն ճանաչում ընտրությունները՝ հասկանալով սակայն դրանց նշանակությունը»,-հայտարարել է Սմիռնովը: