«Հարսնաքար» ռեստորանային համալիրում դաժանորեն ծեծի ենթարկված ռազմական բժիշկ, մայոր Վահե Ավետյանի հիշատակին նվիրված մոմավառության մասնակիցները, արարողությունից հետո ուղևորվել են ՀՀ Ֆուտբոլի ֆեդերացիայի նախագահ Ռուբեն Հայրապետյանի տուն:
Այսօր լրացել է Ավետյանի մահվան 40-րդ օրը:
Ոստիկանությունը թույլ չի տալիս կանգնել Հայրապետայնի տան մերձակայքում` կոչ անելով ցուցարարներին անցնել փողոցի հակառակ կողմով:
Երթի ընթացքում լեզվակռիվ է տեղի ունեցել ազգագրագետ Հրանուշ Խառատյանի և օրինապահ մարմինների ներկայացուցիչների միջև: Խառատյանը համառորեն փորձում էր Հայրապետյանի տան մոտ կանգնելու և իր պահանջները բարձրաձայնելու թույլտվություն ստանալ, դեպքի վայրից հաղորդում է PanARMENIAN.Net-ի թղթակիցը:
Աճառյան 29 հասցեում գտնվող ՀՀԿ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում հունիսի 17-ին ծեծի էին ենթարկվել ՊՆ կենտրոնական կայազորի ռազմական հոսպիտալի ԼՈՌ բաժանմունքի պետ, բուժծառայության մայոր Վահե Ավետյանը, նույն հոսպիտալի բժիշկ Արտակ Բայադյանը և ՊՆ ավագ լեյտենանտ Գարիկ Սողոմոնյանը:
Հունիսի 29-ին, ծեծից հետո այդպես էլ գիտակցության չգալով, մահացել է ՊՆ կենտրոնական կայազորի ռազմական հոսպիտալի ՊՆ բուժծառայության մայոր 35-ամյա Վահե Ավետյանը: