Ապոֆիս աստերոիդի հետագծի հաշվարկները, որոնք հաշվի են առնում նաև Յարկովսկու էֆեկտի գործոնը, ցույց են տալիս, որ երկիր մոլորակի հետ նրա բախման հավանականությունը շատ փոքր է: Ինչպես հայտնում է «ՌԻԱ Նովոստի» գործակալությունը, այդ մասին չորեքշաբթի հայտարարել է ՌԳԱ Աստղագիտության ինստիտուտի առաջատար գիտաշխատող Վիկտոր Շորը՝ ելույթ ունենալով Մոսկվայում Աէրոտիեզերական միջազգային կոնգրեսում:
«Գիտնականները տարբեր կերպ են գնահատում Ապոֆիսի ուղեծիրը: Այս ուղեծիրը հաշվարկելիս հաշվի չի առնվել ոչ գրավիտացիոն արագացումը՝ Յարկովսկու էֆեկտը, որը կարող է զգալիորեն փոխել Ապոֆիսի շարժումը: Այստեղից եզրակացնում ենք, որ աստերոիդի բախման հավանականությունը Երկիր մոլորակի հետ 2036թ. չնչին է»,-ասել է Շորը:
Ըստ մասնագետների, Ապոֆիսը 38 հազար կմ հեռավորության վրա կմոտենա Երկիր մոլորակին 2029թ. ապրիլի 13-ին: