Ռասմուսենը մեղադրել է Բաքվին ղարաբաղյան խնդրի կարգավորմանն ուղղված ջանքերին վնասելու մեջ

7 սեպտեմբերի 2012 - 16:12 AMT

PanARMENIAN.Net - ՆԱՏՕ-ի գլխավոր քարտուղար Անդերս ֆոգ Ռասմուսենը մեղադրում է Ադրբեջանին ղարաբաղյան խնդրի կարգավորմանն ուղղված ջանքերին վնասելու մեջ, քանի որ վերջինս ներում է շնորհել հայ սպա Գուրգեն Մարգարյանին կացնահարած և դրա համար Հունգարիայում ցմահ բանտարկության դատապարտված Ռամիլ Սաֆարովին, հայտնում է «Ռոյթերս» գործակալությունը:

«Հակամարտությունը Հայաստանի ու Ադրբեջանի միջև չպետք է վերսկսվի»,-ասել է Ռասմուսենը Բաքվի դիվանագիտական ակադեմիայի ուսանողների հետ հանդիպմանը՝ հավելելով, որ «վեճը չունի ռազմական լուծում»:

«Ես խորապես մտահոգված եմ Ռամիլ Սաֆարովին ներելու Ադրբեջանի որոշմամբ: 2004թ. նրա գործած արարքը հանցագործություն է, որը չպետք է փառաբանվի, քանի որ դա նվազեցնում է վստահությունը և չի նպաստում խաղաղ կարգավորմանը»,-ասել է Ռասմուսենը, որն ավելի ուշ պետք է հանդիպեր Ադրբեջանի նախագահ Իլհամ Ալիևի հետ:

2004թ. փետրվարի 19-ին լեյտենանտ Գուրգեն Մարգարյանը Բուդապեշտում գազանաբար կացնահարվեց ադրբեջանցի սպա, ավագ լեյտենանտ Ռամիլ Սաֆարովի կողմից: Երկուսն էլ Բուդապեշտում մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակներում կազմակերպված անգլերեն լեզվի դասընթացներին:

2006թ. ապրիլի 13-ին մարդասպանը Բուդապեշտում դատապարտվեց ցմահ բանտարկության՝ 30 տարվա ընթացքում առանց ներման իրավունքի:

Օգոստոսի 31-ին Հունգարիան արտահանձնեց Սաֆարովին Ադրբեջանին, որտեղ նրան անհապաղ ներում շնորհվեց: Հայաստանը խզեց դիվանագիտական հարաբերությունները Հունգարիայի հետ:

Գուրգեն Մարգարյան

2004-ի փետրվարի 19-ին ադրբեջանցի սպա Ռամիլ Սաֆարովը գիշերը կացնահարել է հայ Գուրգենի Մարգարյանին, երբ նա քնած էր: Երկուսն էլ մասնակցում էին Բուդապեշտում ՆԱՏՕ-ի «Գործընկերություն հանուն խաղաղության» ծրագրի շրջանակում կազմակերպված անգլերենի դասընթացներին: Սաֆարովն առաջին հարցաքննության ժամանակ իր արարքի պատճառներն այսպես է բացատրել. «Ափսոսում եմ, որ ոչ մի հայ մինչ այժմ չեմ սպանել... Բանակն ինձ գործուղեց այս դասընթացներին, և այստեղ իմացա, որ մեզ հետ դասընթացներում նաև երկու հայ կա: Ասեմ, որ իմ մեջ ատելություն ծագեց հայերի հանդեպ: Սկզբում բարևում էինք, այսինքն` նրանք էին բարևում, ես չէի պատասխանում: Սպանության պատճառն այն է, որ նրանք անցան մեր մոտով և ժպտացին մեր երեսին: Այդ պահին որոշեցի սպանել նրանց, այսինքն՝ լուսադեմին կտրել գլուխները»:

2006-ի ապրիլի 13-ին Բուդապեշտի առաջին ատյանի դատարանը դատապարտել է Սաֆարովին ցմահ բանտարկության առանց ներման իրավունքի 30 տարվա ընթացքում: 2007-ի փետրվարին Վճռաբեկ դատարանը դատավճիռն ուժի մեջ է թողել:

2012-ի օգոստոսի 31-ին Հունգարիան Ռամիլ Սաֆարովին արտահանձնել է Ադրբեջանին, որտեղ նրան որպես հերոս են դիմավորել: Նախագահ Իլհամ Ալիևը նրան ներելու մասին հրամանագիր է ստորագրել, վճարել 8 տարվա աշխատավարձն ու բարձրացրել զինվորական կոչումը:

Ավելի ուշ Հայստանի ԱԳՆ-ն Հունգարիայի արտգործնախարարությանը տեղեկացրել է երկու պետությունների միջև դիվանագիտական հարաբերությունները կասեցնելու` ՀՀ կառավարության որոշման մասին։