Լիտվայի խորհրդարանի մի խումբ պատգամավորներ հայտարարություն են տարածել՝ մտահոգություն հայտնելով Ադրբեջանի նախագահ Իլհամ Ալիևի կողմից հայ սպայի կացնահարության համար Հունգարիայում ցմահ ազատազրկման դատապարտված Ռամիլ Սաֆարովին ներում շնորհելու վերաբերյալ:
Ըստ պատգամավորների, Սաֆարովի ներումը «կարող է այլ հանցագործությունների պատճառ դառնալ, հակասում է միջազգային իրավունքի նորմերին և կարող է ձախողել հաշտեցման գործընթացը Ադրբեջանի ու Հայաստանի միջև»:
Հայտարարությունը ստորագրել են Ազատականների շարժման ներկայացուցիչներ Ալգիս Կաշետան և Դալյա Կուոդիտեն, պահպանողականներ Մասյուլիսն ու Լոումանասը, «աշխատանքային կուսակցության անդամ» Դանգուտե Միկուտենեն, հայտնում է Դելֆին:
2004թ. փետրվարի 19-ին լեյտենանտ Գուրգեն Մարգարյանը Բուդապեշտում գազանաբար կացնահարվեց ադրբեջանցի սպա, ավագ լեյտենանտ Ռամիլ Սաֆարովի կողմից: Երկուսն էլ Բուդապեշտում մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակներում կազմակերպված անգլերեն լեզվի դասընթացներին: 2006թ. ապրիլի 13-ին մարդասպանը Բուդապեշտում դատապարտվեց ցմահ բանտարկության՝ 30 տարվա ընթացքում առանց ներման իրավունքի: Հայաստանի նախագահ Ռոբերտ Քոչարյանի հրամանագրով Գուրգեն Մարգարյանը 2005թ. փետրվարի 19-ին հետմահու պարգևատրվեց «Արիության համար» մեդալով՝ ծառայության ընթացքում դրսևորած արիության ու ինքնազոհողության համար:
Օգոստոսի 31-ին Սաֆարովը Հունգարիայի կողմից արտահանձնվեց Ադրբեջանին, որտեղ անհապաղ ներում ստացավ՝ նրան շնորհվեց մայորի կոչում, նոր բնակարան, վճարվեց 8 տարվա աշխատավարձը: Ի պաստասխան Հայաստանը կասեցրեց դիվանագիտական հարաբերությունները Հունգարիայի հետ:
Մինչդեռ հունգարական կողմը պնդում է, որ Բաքուն հավաստիացումներ է տվել, որ Սաֆարովը կշարունակի կրել պատիժն Ադրբեջանում, ոչ պակաս քան 25 տարի:
Ըստ որոշ տվյալների Սաֆարովն արտահանձնվել է Ադրբեջանի կողմից 2-3 մլրդ եվրոյի պարտատոմսեր գնելու Բաքվի խոստման դիմաց: Պաշտոնական Բուդապեշտը դա հերքում է: