«Ալ-Քաիդայի» առաջնորդի եղբայրը առաջարկել է ԱՄՆ-ին և Արևմուտքին 10 տարով հաշտություն կնքել
«ԱԼ-Քաիդա» միջազգային ահաբեկչական կազմակերպության առաջնորդի` Այման ազ-Զավահիրիի եղբայր Մուհամմեդը ամերիկյան CNN հեռուստաալիքին տված հարցազրույցում առաջարկել է Արևմուտքի երկրներին, մասնավորապես` ԱՄՆ-ին, իսլամիստների հետ հաշտության պայմանագիր կնքել: Մուհամմեդ ազ-Զավահիրիի խոսքով, նա պատրաստ է որպես միջնորդ հանդես գալ արևմտյան գերտերությունների և իսլամիստական կազմակերպությունների միջև:
Նա հայտարարել է, որ նախապատրաստել է 10 տարվա հաշտության պայմանագիր, որի հիմնական դրույթն այն է, որ ԱՄՆ-ն և Արևմտյան պետությունները պետք է հրաժարվեն միջամտել իսլամական պետությունների գործերին: Մյուս պահանջն էլ այն է, որ ամերիկյան բանտից ազատ արձակվեն այն դատապարտյալները, որոնք մեղադրվում են Իսլամիստական կազմակերպությունների հետ կապում:
