Հալեպում մարտերը մեկնարկել են երեկ երեկոյան, ինչի արդյունքում էլ մեր հայրենակիցները օդանավակայանի ճանապարհին ընկել էին կրակահերթի տակ: Այս մասին PanARMENIAN.Net-ի թղթակցի հետ զրույցում ասաց «Սիրիահայերի աջակցության և օգնության էջի» հիմնադիր-ղեկավար Անահիտ Ադամյանը, փոխանցելով հալեպաբնակ իր աղբյուրի խոսքերը:
«Ասում է` երեկ երեկոյան 7 հայ են սպանել, բոլոր հիվանդանոցներում մեր հայրենակիցներն են, նրանք էլ վիրավորվել են: Շատ վատ է վիճակը, չգիտեն` ինչ է կատարվում, հայերի համար շատ վտանգավոր վիճակ է Հալեպում»,- ասաց Ադամյանը:
Նա տեղեկացրեց նաև, որ իրավիճակը լարված է նաև հայաշատ Նոր Գյուղ թաղամասում:
«Հալեպահայի խոսքով՝ այժմ իշխանական օդուժը կրակահերթի տակ է պահում Նոր Գյուղը, որտեղ հաստատվել են ապստամբները: Յուրաքանչյուր րոպեն իրենց համար կարող է ճակատագրական լինել, ուստի միայն աղոթում են՝ հուսալով, որ լավ կլինի», - հավելեց Ադամյանը:
