Հակաահաբեկչական գործողությունների իրականացման և անվտանգության տեսակետից Հայաստանը շատ հուսալի երկիր է, ինչն արտահայտված է նաև միջազգային փաստաթղթերում: Այդ մասին հայտարարել է Հայաստանի Ազգային անվտանգության խորհրդի քարտուղար Արթուր Բաղդասարյանը՝ մեկնաբանելով այն տեղեկատվությունը, որ Հայաստանն ընդգրկված է այն 40 երկրների ցանկում, որտեղ ԱՄՆ զբոսաշրջիկներին կարող է վտանգ սպառնալ: Նա մասնավորապես նշել է ՆԱՏՕ-ի ու Եվրամիության հաշվետվությունները, որոնք պաշտոնապես հրապարակված փաստաթղթեր են, որտեղ նշված է Հայաստանի զգալի առաջընթացը ահաբեկչության և կիբերահաբեկչության դեմ պայքարում:
«Հայաստանը երբեք առնչություն չի ունեցել ահաբեկչության հետ և չի նշվել այդ առումով ոչ մի միջազգային հաշվետվության մեջ»,-ասել է ԱԱԽ քարտուղարը Բաղդասարյանը հավելել է նաև, որ, չնայած այս ամենին, Հայաստանում միշտ մեծ ուշադրություն է դարձվել ահաբեկչության դեմ պայքարին, երկրում գործում է հատուկ միջգերատեսչական հանձնաժողով, կա Ահաբեկչության և կիբերահաբեկչության դեմ պայքարի ազգային ծրագիր, որտեղ ընդգրկված է 14 պետական մարմին: «Այդ իմաստով մենք մտահոգվելու պատճառ չունենք»,-նշել է նա:
