Լեռնային Ղարաբաղի հարցն առաջին հերթին ԼՂՀ ժողովրդի ինքնորոշման իրավունքի հարցն է, Երեւանում կայացած մամուլի ասուլիսում հայտարարել է Հայաստանի արտգործնախարար Վարդան Օսկանյանը: «Այդ իրավունքը նա իրականացնում է մի տարածքում, որը երբեք չի եղել անկախ Ադրբեջանի կազմում»,- նշել է նա: Մեկնաբանելով բանակցային գործընթացում ԼՂՀ մասնակցության հարցը` Վ. Օսկանյանը կարծիք է հայտնել, որ չնայած Ստեփանակերտը ուղղակի չի մասնակցում բանակցություններին, սակայն ընդհանուր գործընթացում նա կա եւ ԼՂՀ իշխանություններն իրազեկ են հանդիպումների բովանդակությանը եւ կապեր ունեն ԵԱՀԿ ՄԽ համանախագահների հետ: «Այնպես որ, երբ սկսվեն բանակցությունները Մինսկի խմբի շրջանակներում, Լեռնային Ղարաբաղը կներառվի դրանցում: Բանակցային գործընթացում ԼՂՀ բացակայության մասին սխալ կարծիքի վառ ապացույցն է, որ ԵԱՀԿ ՄԽ համանախագահներն իրենց այցի ժամանակ անպայման այցելում են Ստեփանակերտ ու հանդիպում են ԼՂՀ իշխանությունների հետ»,- հիշեցրել է նախարարը: Վ.Օսկանյանը ընդգծել է նաեւ, որ Հայաստանի եւ ԼՂՀ իշխանությունների միջեւ որեւէ հակասություններ չկան, հակառակ դեպքում դրանք կհրապարակվեին: Միեւնույն ժամանակ նախարարը նշել է, որ լսել է որոշ քաղաքական գործիչների դժգոհությունը, սակայն դրանք ԼՂՀ-ի պաշտոնատար անձանց կողմից չի արտահայտված: «Այլ բան է ասել, որ վերջնական փաստաթղթի պատրաստման հարցում առանց Լեռնային Ղարաբաղի համաձայնության եւ մասնակցության հարցը չի կարող լուծվել` դրան ես լիովին համաձայն եմ»,- նշել է նախարարը: