Ավան և Նոր-Նորք վարչական շրջանների ընդհանուր իրավասության դատարանում այսօր , դատավոր Դավիթ Հարությունյանի նախագահությամբ տեղի ունեցավ ՀՀԿ կուսակցության անդամ, ՀՖՖ նախագահ Ռուբեն Հայրապետյանի ընտանիքին պատկանող «Հարսնաքար» ռեստորանային համալիրում ռազմական բժիշկներին դաժան ծեծի ենթարկելու և Վահե Ավետյանի մահվան գործով դատաքննության երկրորդ նիստը: Նախորդ անգամ նիստը հետաձգվել էր, քանի որ մեղադրյալներից մեկը՝ Արման Խաչատրյանը , չուներ իրավապաշտպան: Այսօրվա նիստում դատարանը ներկայացրեց նրա փաստաբանին: Արման Խաչատրյանի շահերը կներկայացնի փաստաբան Ավագ Լալայանը:
Ավագ Լալայանը դատարանից պահանջեց իրեն 7 աշխատանքային օր տրամադրել՝ գործի նյութերին ծանոթանաօլու համար: Պաշտպանի միջնորդությամբ նիստը հետաձվեց մինչև հոկտեմբերի 3-ը:
Նախքան դատական նիստի հետաձգումը, մեղադրող կողմի ներկայացուցիչ Վահե Գրիգորյանը դատարանից պահանջեց լրագրողների համար պատշաճ պայմաններ ապահովել, որպեսզի նրանք կարողանան իչնչպես հարկն է լուսաբանել նիստերը: Վահե Գրիգորյանն ասաց, որ նիստերի դահլիճի առաջին շարքում նստած են քաղաքացիական հագուստով ոստիկաններ, ովքեր լրագրողներին թույլ չեն տվել զբաղեցնել առաջին շարքը: Դատավոր Դավիթ Հարությունյանը խոստացավ ի գիտություն ընդունել փաստաբանի դիտարկումը:
Նշենք, որ դատական նիստին ներկա չէին գործով մյուս տուժողները և Վահե Ավետյանի իրավահաջորդը՝ Գառնիկ Ավետյանը: Դատի ընթացքում ու մինչև հիմա դատարանի առջև է ՀԱԿ ակտիվիստ Վարդգես Գասպարին: Նա դատարան էր եկել ցուցապաստառով, որի վրա գրված էր «Նեմեց մարդասպան»:
Նշենք նաև, որ դատական նիստին ներկա էին մի շարք քաղաքական գործիչներ այդ թվում «Ժառանգություն» խմբակցության ղեկավար Րաֆֆի Հովհաննիսյանը և «Նոր ժամանակներ» կուսակցության ղեկավար Արամ Կարապետյանը:
Հիշեցնենք, որ 2012 թ. հունսի 17-ին ՀՀ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի աշխատակիցները, որոնցից մեկը Ռուբեն Հայրապետյանի թիկնազորի անդամ է, դաժան ծեծի են ենթարկել մի խումբ քաղաքացիների: Նրանցից երեքը` Վահե Ավետյան, Արտակ Բայադյան, Գարիկ Սողոմոնյան, տեղափոխվել են հիվանդանոց: Հունիսի 29-ի երեկոյան Վահե Ավետյանը, գիտակցության չգալով, մահացել է: Մահվան դեպքի առթիվ հարուցվել էր քրեական գործ, կալանավորվել էր 6 մարդ:
