Թունիսի իշխանությունները մտադիր են մահապատիժ պահանջել 87 ցուցարարների համար, որոնք մեղադրվում են ԱՄՆ դեսպանատունը գրոհելու փորձի մեջ՝ «Մահմեդականների անմեղությունը» ֆիլմի դեմ բողոքների ժամանակ:
Ինչպես հայտնում է «Ասոշեյթիդ պրես» գործակալությունը, անկարգություններին մասնակցելու համար ձերբակալված 87 մարդ այժմ դատի է սպասում մի շարք մեղադրանքների գծով, այդ թվում պետանվտանգության աշխատակիցների վրա հարձակման համար: Դատախազությունը բոլորի համար մահապատիժ է պահանջելու:
Հիշեցնենք, որ հակաիսլամիստական ֆիլմի բովանդակությամբ վրդովված հարյուրավոր թունիսցիներ սեպտեմբերի 14-ին փորձել են գրոհել Թունիսում ԱՄՆ դեսպանատունը: Ըստ ԶԼՄ-ների, շենքում կոտրել են ապակիները, ամբոխը հրկիզել է դեսպանատան մոտ աճող ծառերը և ամերիկյան դրոշի փոխարեն կախել է սև դրոշ: Անկարգությունները կասեցնելու համար ոստիկանությունը ռետինե փամփուշտներ ու արցունքաբեր գազ է կիրառել: Զոհվել է 4 մարդ, վիրավորվել է 49:
