Լեռնային Ղարաբաղի վերաբերյալ Եվրախորհրդի խորհրդարանական վեհաժողովի զեկուցող Դեւիդ Աթկինսոնն անտեղյակ է ղարաբաղյան հակամարտության էությանը: Այս մասին հայտարարել է ԵԱՀԿ Մինսկի խմբի Ռուսաստանի կողմից համանախագահ Վլադիմիր Կազիմիրովը` ելույթ ունենալով «Երեւան» հյուրանոցում ղարաբաղյան հիմնախնդրին նվիրված քննարկումների ժամանակ: Կազիմիրովը նշել է, որ լիովին համաձայն է այն պնդումներին, որոնց համաձայն` վատ չէր լինի, եթե արեւմտյան վերլուծաբաններն ուսումնասիրեին խորհրդային օրենքները, որոնցով ղեկավարվել է Լեռնային Ղարաբաղը` Ադրբեջանական ԽՍՀ կազմից դուրս գալուց: «Այդ ամենին Դեւիդ Աթկինսոնը, դժբախտաբար, տեղյակ չի եղել, նա տեսել է այն ինչ եղել է մակերեւույթին` հայկական զինված ուժերի Լեռնային Ղարաբաղից հեռու տարածքում գտնվելը, իսկ նրան պետք էր գոնե մեկ անգամ մեկնել Լեռնային Ղարաբաղ: Այս ամենը խոսում է նրա անգրագիտության եւ անիրազեկության մասին»,- հայտարարել է ռուս դիվանագետը: Ընդսմին նա ընդգծել է, որ իրերն անհրաժեշտ է անվանել իրենց անուններով եւ «գրավյալ տարածքները մնում են գրավյալ` առանց որեւէ էմոցիաների»: