ԲՀԿ-ի և մնացած այլ քաղաքական ուժերի հետ միասնական թեկնածու ունենալու մասին ՀԱԿ-ում որևէ հարց չի քննարկվել: Այս մասին այսօր լրագրողներին հայտնեց ԱԺ ՀԱԿ խմբակցության նախագահ Լևոն Զուրաբյանը:
«ՀԱԿ-ն ունի իր թեկնածուն` Լևոն Տեր-Պետրոսյանն է: Այդ մասին դեռ պաշտոնապես չենք հայտարարել, բայց ամենայն հավանականությամբ կլինի նա»,- ասաց բանախոսը` վստահեցնելով, որ մինչ այժմ մամուլում շրջանառվող հավանական թեկնածուների վերաբերյալ վարկածները անիմաստ քննարկումների արդյունք են:
ՀԱԿ-ի անդամների միջև հակասությունների վերաբերյալ Լ. Զուրաբյանը նշեց. «Մենք բոլորս էլ կենտրոնական շտաբի անդամներ ենք: Ես չգիտեմ մեր շտաբից երկու անդամ, որ հակասություններ չեն ունեցել այս կամ այն հարցի շուրջ: Բայց դրանք միայն շարժիչ ուժեր են, որոնք նպաստում են առաջընթացին: Մենք պահպանում ենք փայլուն ընկերական հարաբերություններ»:
Իսկ ինչ վերաբերվում է գալիք նախագահական ընտրություններին, Զուրաբյանը հավաստիացրեց, որ երբևիցե այդ հարցի շուրջ հակասություններ չեն եղել: «Նախագահական ընտրությունների վերաբերյալ, մենք կենտրոնացած ենք Լևոն Տեր-Պետրոսյանի առաջադրման հարցի վրա, իսկ պահեստային թեկնածուների մասին չենք մտածում»,-ասաց Լևոն Զուրաբյանը:
Անդրադառնալով հանրահավաք անցկացնելուն` ասաց. «Մենք հասկացանք, որ ժողովուրդը մեզանից սպասում է մեկ հարցի պատասխան, այն է ` որը կլինի ՀԱԿ-ի ռազմավարությունը նախագահական ընտրություններում: Ու քանի որ մենք այդ հարցի պատասխանը դեռ չունենք, իմաստ չունի հավաքել ժողովրդին»:
