ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունեց Հայաստանում ՄԱԿ-ի մշտական համակարգող, Միացյալ ազգերի զարգացման ծրագրի (ՄԱԶԾ) մշտական ներկայացուցիչ Դաֆինա Գերչևային` Հայաստանում առաքելության ավարտի կապակցությամբ:Այս մասին PanARMENIAN.Net-ին հայտնում են ՏԿՆ հասարակայնության հետ կապերի բաժնից:
Փոխվարչապետն արդյունավետ համարեց ՄԱԿ-ի երևանյան գրասենյակի հետ համագործակցությունը, դրանում ընդգծելով նաև տիկին Գերչևայի անձնական ջանքերը: Նա հատկապես գոհունակություն հայտնեց մարզերում և համայնքներում ՄԱԶԾ աջակցությամբ իրականացվող ծրագրերի կապակցությամբ և հույս հայտնեց, որ ընթացքում գտնվող ծրագրերը կշարունակվեն և ավարտին կհասցվեն: Փոխվարչապետը նաև հաջողություն մաղթեց Դ.Գերչևային հետագա աշխատանքում:
Դ. Գերչևան իր հերթին բարձր գնահատեց պաշտոնավարման ընթացքում Տարածքային կառավարման նախարարության, մարզպետարանների և համայնքների հետ համատեղ աշխատանքը: Նա կարևոր համարեց, որ Հայաստանում ՄԱԶԾ-ի ծրագրերն առավելապես իրականացվել են կառավարության և հասարակական կազմակերպությունների հետ համատեղ և ուղղված են եղել համայնքների զարգացմանը: Դ. Գերչևան վստահություն հայտնեց, որ փոխգործակցության նույն մակարդակը հետագայում ևս կպահպանվի:
