Հայաստանի վարչապետ Տիգրան Սարգսյանը հոկտեմբերի 30-ին ներկայացրել է խորհրդարանին Հայաստանի 2013թ. պետբյուջեի նախագիծը: «Առաջիկա տարվա գերակա խնդիրն է մակրոտնտեսական կայունության ապահովումը: Ելնելով դրանից՝ մենք այս պահի դրությամբ նախատեսում ենք ապահովել 6,2 տոկոս տնտեսական աճ՝ այս տարվա 7 տոկոսի փոխարեն»,-ասել է նա: Նման մոտեցումը վարչապետը պայմանավորել է նրանով, որ ըստ կանխատեսումների, համաշխարհային տնտեսությունը վտանգավոր վիճակում է գտնվում, իսկ ԱՄՀ-ն ու ՀԲ-ն նվազեցնում են տնտեսական աճի կանխատեսումները, այդ թվում զարգացող երկրների համար: «Դա նշանակում է, որ մենք պետք է բավականին զգուշավոր մակրոտնտեսական քաղաքականություն վարենք, հաշվի առնելով 2013 թվականի հնարավոր ռիսկերը»,-ասել է վարչապետը:

Ըստ նրա, 2013թ. պետբյուջեն հիմնված է երեք սկզբունքի վրա՝ ապահովել տնտեսության մրցունակությունը, մարդկային կապիտալի զարգացումը և արդյունավետ ինստիտուտների զարգացումը: Վարչապետը հավելել է, որ դա թույլ կտա Հայաստանին պահպանել բարձր տնտեսական աճը, շարունակել դիվերսիֆիկացման քաղաքականությունը, բարելավել գործարար և ներդրումային մթնոլորտը, լուրջ փոփոխություններ կատարել սոցիալական քաղաքականության մեջ:

Ըստ պետբյուջեի 2013թ. նախագծի, գնաճը նախատեսված է 4±1,5% մակարդակում, պակասուրդը կկազմի 124 մլրդ դրամ: Պետբյուջեի ընդհանուր եկամուտը նախատեսվում է 1 տրլն 59 մլրդ դրամի չափով, ծախսերը՝ 1 տրլն 183 մլրդ դրամի: