Սեպտեմբերի վերջի տվյալնելով Հայաստանի պետպարտքը կազմում է 4,316 մլրդ դոլար: Այդ մասին հոկտեմբերի 30-ին կայացած ճեպազրույցում լրագրողներին է հայտնել Հայաստանի գլխավոր գանձապետ, ֆինանսների փոխնախարար Ատոմ Ջանջուղազյանը: Ըստ նրա, ՀՀ կառավարության պարտքը կազմում է 3,721 մլրդ դոլար: « Արտաքին պարտքը կազմում է 3,146 մլրդ դոլար, իսկ 575,3 մլն դոլար՝ ներքին պարտքն է»,-հավելել է նա:

Ինչպես ավելի վաղ հայտարարել էր ֆինասնավարկային և բյուջետային հարցերով մշտական խորհրդարանական հանձնաժողովի նախագահ Գագիկ Մինասյանը, Հայաստանի արտաքին պարտքը 2012-ի տվյալներով կկազմի 3,8 մլրդ դոլար, իսկ 2013-ի տվյալներով` շուրջ 4 մլրդ դոլար: Նա նշել էր նաև, որ հաշվի առնելով այն, որ ՀՆԱ-ն աճում է, ապա երկու դեպքերում մենք կունենանք ՀՆԱ-ում արտաքին պետական պարտքի հարաբերակցություն 3,7 տոկոսի մակարդակում, ինչը գնահատվում է որպես «միջին» պետական պարտք երկրի համար»,- ասել է նա:

Այդ առումով Մինասյանը հավելել է, որ Հայաստանի բյուջեն «հավասարակշռված» է և դրա սպասարկումը չի խանգարում նշված ծրագրերի իրագործմանը:

Նշենք, որ 2013 թվականից Հայաստանը պետք սկսի վճարել նախորդ տարի ստացած վարկերի համար, այդ թվում նաև օպերատիվ ռեժիմով ճգնաժամի շրջանում ներգրավված վարկերի դիմաց, ինչը լրացուցիչ 200 մլն դոլարի բեռ կլինի պետբյուջեի համար: