ՀՀ փոխվարչապետ, տարածքային կառավարման նախարար Արմեն Գևորգյանի մոտ մարզպետների մասնակցությամբ այսօր կայացած խորհրդակցության ընթացքում ՀՀ Սփյուռքի նախարար Հրանուշ Հակոբյանն անդրադարձավ սիրիահայերի բնակարանային ապահովության խնդրին: Նախարարը մարզպետներին առաջարկեց տեղեկություններ ներկայացնել մայրաքաղաքին մոտ գտնվող համայնքներում վարձակալության հիմունքներով տրվող բնակարանների առկայության, ինչպես նաև համայնքներում թափուր աշխատատեղերի վերաբերյալ:
Ինչպես հայտնում է ՀՀ ՏԿՆ հասարակայնության հետ կապերի բաժինը, փոխվարչապետը մարզպետներին հանձնարարեց մեկշաբաթյա ժամկետում Սփյուռքի նախարարություն ներկայացնել պահանջվող տեղեկությունները, ինչպես նաև հաշվի առնելով սիրիահայերի մասնագիտական հմտությունները` քննարկել տեղերում աշխատանքով ապահովելու հնարավորությունները:
Խորհրդակցությանը ՀՀ գյուղատնտեսության նախարար Սերգո Կարապետյանը ներկայացրեց մարզերում հողօգտագործողներին մատչելի գնով պարարտանյութ և դիզելային վառելանյութ տրամադրելու պետական ծրագրերի ընթացքը: Նշվեց, որ պարարտանյութի բաշխման աշխատանքները մոտենում են ավարտին, ընթացքի մեջ է դիզվառելանյութի բաշխումը: Անդրադարձ եղավ նաև առաջին վերարտադրության սերմացուի դիմաց գյուղացիական տնտեսությունների կողմից պարտավորությունների կատարման ընթացքին ու ցուցանիշներին: Փոխվարչապետը մարզպետներին հանձնարարեց աջակցել Գյուղատնտեսության նախարարությունը ծրագրերի իրականացման հարցում:
Քննարկվեցին նաև մթերման գործընթացին վերաբերող հարցեր: Փոխվարչապետը նշեց, որ մթերող կազմակերպությունների կողմից վճարումների ուշացման խնդիրն այսօր համայնքապետերը բարձրացրել են Արմավիրի մարզ կատարած այցի ժամանակ, և կարևորեց բերքի դիմաց վճարումների կատարումը:
Անդրադարձ կատարվեց նաև համայնքային բյուջեների վրա 2013 թ. հունվարի 1-ից «Եկամտային հարկի մասին» ՀՀ օրենքի կիրարկման և նվազագույն աշխատավարձի դրույքաչափի փոփոխության ազդեցությանը: Գևորգյանը մարզպետներին հանձնարարեց աշխատել համայնքապետերի հետ, որպեսզի կատարված օրենսդրական փոփոխությունները հաշվի առնելով` համապատասխան հաշվարկներ կատարվեն և նախատեսվեն վճարման աղբյուրները:
