Անկարան ոչ միայն պետք է ճանաչի 1915 թ. Օսմանյան Թուրքիայում Հայոց ցեղասպանությունը, այլեւ փոխհատուցի հայ ժողովրդին կատարած հանցագործության համար: Այդ մասին այսօր Երեւանում կայացած մամլո ասուլիսում հայտարարել է թուրքական «Մշակութային փոխանակման միջազգային ֆեդերացիա» կազմակերպության ներկայացուցիչ Յամալ Արշարը: Նրա խոսքերով, իր ներկայացրած կազմակերպությունը հանդես է գալիս թուրքական կոտորածից եվրոպական երկրներում հրաշքով փրկված սփյուռքահայերի իրենց հայրենիք` Արեւմտյան Հայաստան վերադարձի օգտին: «Մենք հանդես ենք գալիս իրենց պատմական հայրենիքում հայ ժողովրդի ինքնորոշման իրավունքի օգտին»,- հայտարարել է Յ. Արշարը: Նա նաեւ հայտարարել է, որ Օսմանյան Թուրքիայում հայերի կոտորածի համար պատասխանատվություն են կրում ոչ միայն Թուրքիայի իշխանությունները, այլեւ թուրք եւ քուրդ ժողովուրդները: Այդ առնչությամբ կազմակերպության մեջ մտնող թուրքերի եւ քրդերի անունից Յ. Արշարը ներողություն է խնդրել հայ ժողովրդից եւ նշել, որ Մշակութային փոխանակման միջազգային ֆեդերացիայի անդամները հայ ժողովրդի հետ միասին կպայքարեն Ցեղասպանության ճանաչման համար: «Հայոց ցեղասպանությունը կարող է ճանաչվել Անակարայի կողմից միայն թուրք եւ քուրդ ժողովուրդների հետեւողական պայքարի դեպքում»,- ընդգծել է Յամալ Արշարը: Իր հերթին «Գերմանական միություն` ընդդեմ Ցեղասպանության» թուրքական կազմակերպության փոխնախագահ Բյուլենդ Գյուլը հայտարարել է, որ Ստամբուլում պետք է կանգնեցվի Օսմանյան Թուրքիայում Հայոց ցեղասպանության զոհերի հուշահամալիր: