Նոյեմբերի 23-ին Համազգային թատրոնում տեղի է ունենալու Պերճ Պռոշյանի «Հացի խնդիրը» ներկայացման պրեմիերան: Այս մասին PanARMENIAN.Net ի թղթակցին հայտնեցին թատրոնից: Ներկայացումը կցուցադրվի նաև նոյեմբերի 25-ին և 30-ին: Ներկայացման ռեժիսորն է Վիգեն Ստեփանյանը: Գլխավոր դերերում հանդես կգան Մխիթար Ավետիսյանը, Տաթևիկ Ղազարյանը, Կարինե Ջանջուղազյանը, Վարշամ Գևորգյանը և այլ հայտնի և սիրված դերասաններ: Ներկայացման ընթացքում հնչելու է Մարտին Վարդազարյանի գրած երաժշտությունը:

«Հացի խնդիր» վեպում Պռոշյանը ներկայացնում է 2 անհաշտ ուժերի հակամարտությունը. բախվում են կեցության 2 ձևեր՝ բարոյական 2 նկարագրով: Նրանցից մեկի ներկայացուցիչ Խեչանենց Խեչանը ձգտում է պահպանել նահապետական համայնքի գոյության դարավոր իրավունքը, մյուսը՝ Միկիտան Սաքոն, կապիտալի նախնական կուտակման մոլուցքով տարված՝ անողոք վայրենությամբ քանդում է նրա հիմքերը: Միկիտան Սաքոն ու նրա նմաններն ապրում են «Ինչ կանես արա, խաբի, քանդի, պլոկի, գռփի, սպանի, թաք մի կտոր հաց ունենաս» սկզբունքով, որովհետև «հացի խնդիր ա»: Պռոշյանը խորությամբ բացահայտել է վերջիններիս գործելակերպի քստմնելիությունն ու բարոյազրկությունը: