Ինչպես ԵՄ անդամակցության այլ թեկնածուներ, Թուրքիան եւս պետք է բոլոր նախադրյալներն ունենա դրա համար, նշել է ԳԴՀ արտգործնախարարության Մարդու իրավունքների եւ հումանիտար օգնության հարցերով Դաշնային կառավարության լիազոր, Բունդեսթագի «Կանաչների միության» խմբակցության համանախագահ Կլաուդիա Ռոտը: Նրա խոսքերով` հայկական հարցը բավականին կարեւոր հարց է, եւ սեփական պատմության հետազոտությունները պետք է բխեն հենց Թուրքիայի շահերից: «1915 թվականի իրադարձությունները դա անկասկած մարդկության դեմ հանցագործություն է»,- նշել է Կլաուդիա Ռոտը: «Մենք` գերմանացիներս, պատմական պատասխանատվություն ենք կրում Հոլոկոստի համար եւ գիտենք, թե ինչքան կարեւոր է այդ մասին հիշելը»,- նշել է նա: Նա հույս է հայտնել , որ Թուրքիան այնուամենայնիվ «կարող է հանել արգելքը եւ զբաղվել Հայաստանի հետ հարաբերությունների հարցով»: Նա նաեւ հիշեցրել է 1915 թվականի իրադարձություններին գերմանացիների մասնակցության մասին: Գերմանական Կայսրության Ռազմա-քաղաքական ղեկավարությունը իրազեկ է եղել այն մասին, թե ինչ է կատարվում Անաթոլիայում, սակայն չի միջամտել: Նա նաեւ վստահություն է հայտնել Հայոց ցեղասպանության փաստերի ուսումնասիրման հարցերով հայ-թուրքական համատեղ հանձնաժողովի ստեղծման անհրաժեշտության առնչությամբ, սակայն նրա խոսքերով` հանձնաժողովը պետք է իրոք անկախ լինի: «Գերմանիայի դերն այդ հարցում կայանում է նրանում, որ նա նպաստի Թուրքիայի եւ Հայաստանի հաշտեցմանը»,- հայտարարել է Ռոտը: