Այսօր ԵՊՀ-ում տեղի ունեցավ ՄԱԿ-ի Անվտանգության խորհրդի մոդելի խորհրդաժողով, որտեղ ուսանողները քննարկում էին ՄԱԿ-ին Պաղեստինի անդամակցության հարցը: Նախքան համաժողովն անցկացվել են դասընթացներ` ՄԱԿ-ի արժեքների, ՄԱԿ-ի ԱԽ գործառույթների և կառուցվածքի, ընթացակարգային կանոնների մասին մասնակիցների գիտելիքները զարգացնելու համար:
Մասնակիցները ծանոթացել են ՄԱԿ-ին Պաղեստինի անդամակցության վերաբերյալ ՄԱԿ-ի անվտանգության խորհրդի անդամների դիրքորոշումներին: Նրանք նաև ծանոթացել են բանակցությունների, բազմակողմ դիվանագիտության արվեստին և ստացել անհրաժեշտ տեղեկություններ:
«Բանակցելու, համաձայնության գալու և հակառակ կողմի կարծիքին հանդուրժողաբար վերաբերվելու կարողությունն օգտակար է ձեր հետագա մասնագիտական առաջընթացի համար և ձեզ կօգնի դառնալ ձեր համայնքների առավել ակտիվ անդամներ»,- խորհրդաժողովի բացման ժամանակ ասաց ՄԱԿ ՀՏՎ ներկայացուցիչ Մարիա Դոցենկոն:
Երևանի պետական համալսարանի պրոռեկտոր Ռուբեն Մարկոսյանն էլ ասաց, որ ինքը տպավորված է ուսանողների խանդավառությամբ: Բոլոր մասնակիցները ստացան վկայականներ և փոքրիկ մրցանակներ:
Ավելացնենք, որ ՄԱԿ-ի մոդել խորհրդաժողովները ՄԱԿ-ի մարմինների դերախաղ են, որի ընթացքում մասնակիցները ներկայացնում են ՄԱԿ-ի տարբեր անդամ պետություններ և քննարկում համաշխարհային նշանակության հարցեր:
