Շուրջ 1 մլն էջ արդեն թվայնացվել է Հայաստանում, լրագրողների հետ հանդիպմանն ասել է Հայաստանի ազգային գրադարանի տնօրեն Տիգրան Զարգարյանը: Նա նշել է, որ առաջին հերթին թվայնացվում են հնատիպ գրքերն ու գիտական աշխատությունները:
Գրադարանային գրքերի թվայնացման գաղափարը պատկանում է Հայաստանի չորս գրադարաններին՝ Ազգային գրադարանին, ՀՀ ԳԱԱ գիտական գրադարանին, ԵՊՀ գրադարանին, Հանրապետական գիտաբժշկական գրադարանին, ինչպես նաև Ազգային գրապալատին:
«Այսօրվա դրությամբ մշակութային ժառանգության պահպանման լավագույն լուծումը թվայնացումն է: Մենք այժմ ակտիվ աշխատում ենք այդ ուղղությամբ: 21-րդ դարի գրադարանավարների համար գրագետ թվայնացումը մարտահրավեր է»,-ասել է նա:
Թվայնացված գրքերը հասանելի են www.flib.sci.am, www.nla.am հասցեներով, դրանք կարող են ներբեռնվել: