Նախագահ Սերժ Սարգսյանը շնորհավորական ուղերձ է հղել Հայաստանի պետական կամերային նվագախմբի 50-ամյակի առթիվ, մաղթել նվագախմբին երկար և բեղմնավոր ուղի, ստեղծագործական նորանոր հաջողություններ` ի փառս հայ մշակույթի և կատարողական արվեստի: Այս մասին հայտնում են նախագահի աշխատակազմի հասարակայնության հետ կապերի և լրատվության վարչությունից:
Հիշեցնենք, որ դեկտեմբերի 1-ին Արամ Խաչատրյան համերգասրահում տեղի ունեցավ նվագախմբի 50-ամյակին նվիրված գալա համերգը: Համերգի ընթացքում ելույթ ունեցավ ՀՀ մշակույթի նախարար Հասմիկ Պողոսյանը, ով նախարարության ոսկե մեդալներ և պատվոգրեր հանձնեց երաժիշտներին: Ընթերցվեցին նաև ՀՀ նախագահի և Ամենայն հայոց կաթողիկոսի ուղերձները: Համերգի հատուկ հյուրն էր ֆրանսիացի անվանի ակորդեոնահար Ռիշար Գալիանոն: